Su Gazetinu, mèrcuris 10 de onniasantu de su 2021
Emergèntzia Coronavirus – In Olanda nd’ant pesadu sa chistione de is 40 turistas firmos in Aristanis in s’albergu Covid de su Mistral, pro ite resurtados positivos a su Coronavirus. Unos cantos de issos si sunt chesciados cun una ràdiu-televisione natzionale narende chi fiant presoneris e argumentende contras de is impèigos prevìdidos dae is règulas sanitàrias italianas. Eris etotu su Comune de Aristanis at fatu a ischire chi a 15 turistas ddos ant postos in s’istatìstica de is impestos in is ùrtimas 24 oras. E semper eris in Aristanis ant postu in cuarantena una classe intrea de s’Istitutu de bia de Bellini, pro more de un’impestu de Covid-19.
In s’interis sunt faghende is averiguaduras in sa salia de is istudiantes de is iscolas primàrgias de Terraba e de Bosa, chi faghent parte de su programma natzionale de is chi ddis narant iscolas-bàrdia. In Terraba is primos test ant dadu resurtadu negativu.
Temporada – Un’àtera die de temporada oe in Sardigna e un’àtera die de istare a s’abbista. S’Amparu tzivile regionale at bogadu un’avisu. Si previdet chi proat meda, prus che totu in sa parte orientale de s’ìsula. S’invitu, custa borta puru, est a tènnere prudèntzia manna, prus che totu cando essimus dae domo o semus in biàgiu.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta