Su Gazetinu, mèrcuris 27 de santugaine de su 2021
Giòvanu mototziclista morit acanta de Bosa – Unu giòvanu mototziclista de Sune, Enrico Cherchi de 31 annos, est mortu eris a merie in sa bia de costera chi aunit a pare Bosa cun S’Alighera. Cherchi nch’est iscutu cun sa mototzicleta sua a su guard rail. In s’atùmbidu, forte meda, est mortu. A nudda est serbidu s’interventu de s’elisucursu. Immoe is Carabineris ant a dèpere istabilèssere s’ora giusta, su pro ite e su comente est acontèssidu s’intzidente.
Sa pisca de s’eritzu de mare in Sardigna si firmat pro tres annos – Pro tres annos in Sardigna at a èssere proibida sa pisca de s’eritzu de mare. Dd’at apostivigadu un’emendamentu a sa lege Omnibus aprovadu eris dae su consìgiu regionale e propostu dae su consigieri aristanesu e cabugrupu de is Frades de Itàlia, Frantziscu Mura. Su provedimentu at a intrare in vigèntzia cun s’aprovu definitivu de sa lege. A is piscadores professionales ddis ant a dare un’indennizu, paghende-ddis unos cantos interventos de limpiadura de su fundale de su mare.
Aristanis, su NAS de is Carabineris nd’issucutat petza iscadida in una coghina chi aprontat màndigos pro is ispidales – Is Carabineris de su NAS nd’ant issucutadu una cantidade de màndigos aprontados cun petza iscadida in unu laboratòriu in ue si cuncordat sa cosa de papare pro is ispidales de su territòriu. Pro su laboratòriu est mòvidu, duncas, s’issucutu amministrativu. Sa faina faghet parte de unu pranu de averiguaduras contivigiadas dae su NAS de is Carabineris in su Tzentru e Sud de Itàlia.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta