Su Gazetinu, martis 26 de santugaine de su 2021 - LinkOristano
Su gazetinu

Su Gazetinu, martis 26 de santugaine de su 2021

Su Gazetinu OK
Su Gazetinu

Martis, 26 de santugaine de su 2021

Sa provìntzia de Aristanis ancoras prima: est sa prus segura in totu Itàlia – Sa provìntzia de Aristanis si cunfirmat ocannu puru sa prus segura in Itàlia. Ddu narat sa chirca chi ònnia annu faghet su cuotidianu Il Sole 24 Ore, chi pigat a cunsideru paràmetros istatìsticos diferentes. Ma, mancari siat ancoras sa prima in Itàlia pro su chi pertocat s’intzidèntzia prus bassa de reatos, in provìntzia de Aristanis si contat una crèschida de reatos de su 3 % cunforma a s’annu in antis.

Tropu cherbos: allarme in Làconi – Is cherbos oramai bivent iscapos in is sartos de Làconi e lompent fintzas a bidda: calicunu ddos at bidos a intro de parcos pùblicos (su parcu Aymerich) e fintzas in giardinos e ortos privados. Cosa chi ponet pistighìngiu a s’Amministratzione comunale. Su sìndigu Salvatore Argiolas at interessadu de su problema s’Amministratzione provintziale de Aristanis e cussa regionale. Sa chedda de cherbos, a parre de su Comune, est crèschida meda in custos ùrtimos annos e immoe arriscat de ingendrare unos cantos problemas chi pertocant is coltivos e sa seguresa istradale.

Una mustra in 5 comunes cun 750 immàgines de fotògrafos sardos – Sa bellesa de 750 immàgines de 55 fotògrafos sardos, in unu museu in logu abertu in Marmidda Arta, cuncordadu in mesu a is fràigos istòricos de Assou, Gonnonò, Sini e Useddus, a prus de su tzentru culturale Move The Box de Bàini. Est s’editzione 2021 de sa mustra “A Banda. Fotografia in Sardigna”, cuncordada dae s’assòtziu “Su Palatu Fotografia” cun s’agiudu de su Cunsòrtziu turìsticu “Duas Jaras”, de is bator Amministratziones comunales, de Bìngias Serrau e de Soter Imprentas.

S’inauguratzione dda faghent sàbadu chi benit, 30 de santugaine, a is bator de merie, in pratza de Renzo Lampis, in Bàini.

Antoni Nàtziu Garau

—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Più informazioni
commenta