Su Gazetinu, giòbia 14 de santugaine de su 2021
Santu Lussurzu, Dies FAI de Atòngiu – In custa coa de chida in Santu Lussurzu s’at a faeddare de nàschida noa a pustis de su fogu de s’istadiale passadu. In un’addòbiu cuncordadu dae su Grupu FAI de Aristanis, a manos de pare cun su Comune, sa bidda s’at a contare pro sensibilizare sa gente in contu de sa liaga de is fogos de s’istadiale. Sa faina faghet parte de su programma de is Dies FAI de Atòngiu. Ant pensadu a unu caminu de unos 5 chilòmetros. Si prevident chimbe turnos de bìsita ònnia die, cun mòvida a is 9.00, 10.00, 11.00, 15.00 e 16.00. Non ddoe at logu pro gente meda; cumbenit duncas a si prenotare in sa pàgina Internet de su FAI.
Sorradile, Prèmiu sardos in su mundu – Su campione olimpiònicu de canotàgiu Stefano Oppo; sa presidente de sa Federatzione de is tzìrculos de is sardos in su mundu, Serafina Mascia; su vitze-presidente de su gigante informàticu Microsoft, Antonio De Palmas; sa cantante Elena Ledda e su tenore Francesco Demuro. Custos sunt is chimbe ambasciadores de sa Sardigna in su mundu chi ant a èssere protagonistas de sa de ses editziones de su Prèmiu biennale “Lagu Omodeo – Nois sardos in su mundu”, in programma dae cras a domìnigu in Sorradile. Sa cunsigna de su prèmiu s’at a fàghere in una tzerimònia in programma pro sàbadu, comintzende dae is oto de merie, in s’istrutura turìstica “Il borgo sul lago”.
Oppo, Mascia, De Palmas, Ledda e Demuro ant a retzire fintzas sa tzitadinàntzia onorària de Sorradile.
Sa tzerimònia de assignatzione de su prèmiu faghet parte de unu programma ricu de addòbios chi punnant a s’avaloramentu de sa comunidade de Sorradile, de is logos de su lagu e de totu sa Sardigna.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta