Su Gazetinu, martis 12 de santugaine de su 2021 - LinkOristano
Su gazetinu

Su Gazetinu, martis 12 de santugaine de su 2021

Su Gazetinu OK
Su Gazetinu

Martis, 12 de santugaine de su 2021

Eletziones comunales – Cunfirmas e sorpresas dae is eletziones comunales in provìntzia de Aristanis.

In Nureci su nùmeru de is chi sunt andados a votare no est istadu bastante pro lòmpere a su quorum e, duncas, su Comune dd’ant a cummissariare.

Carchi duda, imbetzes, at acumpangiadu s’eletzione a sìndigu de Cùglieri de Andrea Loche, chi aiat giai ghiadu su Comune: su Ministeru at fatu a ischire de una riserva (no ufitziale) chi pertocat su contu de is eletores in s’èsteru pro pòdere lòmpere a su quorum.

In Marrùbiu su sìndigu nou est Luca Corrias. S’ex vitze-sìndigu de sa bidda fiat s’ùnicu chi aiat presentadu una lista.
Annalisa Mele est su primu sìndigu leghista de sa provìntzia de Aristanis. Sa consigiera regionale at a ghiare sa bidda sua, Bonàrcadu.

Su Comune de Arriora nde essit dae su cummissariamentu cun Lorenzo Pinna, chi dd’ant elègidu a sìndigu de sa bidda. Si fiat candidadu pro sìndigu fintzas in su 2018, cando però is eletziones ddas aiat bintas Mauro Saba; ex assessore in sa giunta ghiada dae Domenico Ari, at propassadu siat a issu siat a s’àtera isfidante, Irene Erdas.

A Paolo Pireddu dd’ant cunfirmadu in sa ghia de su Comune de Biddobrana. Pireddu at bintu a s’isfidante Daniel Meloni.
In Iscanu ant torradu a elèghere a sìndigu a Antonio Flore Motzo. Sa lista sua fiat s’ùnica chi curriat pro guvernare sa bidda in is chimbe annos imbenientes.

In Sabarussa s’ex consigieri regionale Mario Tendas isfidaiat su quorum e dd’at bintu, cunfirmende-si sìndigu de sa bidda. Tendas comintzat immoe su de duos mandatos suos.

Una fèmina, imbetzes, at a ghiare su comune prus piticu de sa Sardigna, Bobadri. S’assessora de is Traballos pùblicos e vitze-sìndigu de Lino Zedda (sìndigu fintzas a s’àtera die) fiat s’ùnica candidada pro sa càrriga de primu tzitadinu.

Emanuele Pilloni est su sìndigu nou de Siris. Fiat consigieri comunale e at bintu a s’isfidante Monica Dessì.

In Tramatza su sìndigu est Maria Sebastiana Moro, mentras Salvatore Soi torrat a ghiare su Comune de Senis a pustis de unos cantos annos: at bintu a su sìndigu chi ddoe fiat, Maria Serena Massa.

Gianni Tatti torrat a ghiare su Comune de Arruinas. S’ex consigieri regionale de s’UDC aiat giai fatu su sìndigu de sa bidda pro bator mandatos in is annos passados. Tatti ghiaiat s’ùnica lista presentada pro is eletziones.

Un’àteru ex sìndigu, Pier Paolo Pisu, chi est istadu fintzas assessore provintziale, est su sìndigu nou de Tadasune. Pisu, chi fiat cummissàriu de sa bidda, at bintu a s’isfidante Livio Deligia.

Marcello Pilloni, imbetzes, est su sìndigu nou de Ollasta (de Useddus). At bintu a s’isfidante Alessandra Muscas.

In fines, in Ollasta (de Simaghis) Osvaldo Congiu est su sìndigu nou: at propassadu a su sìndigu chi ddoe fiat in sa legisladura chi est agabbada, Giovanni Cianciotto.

Antoni Nàtziu Garau

—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

commenta