Su Gazetinu, sàbadu 2 de santugaine de su 2021 - LinkOristano
Su gazetinu

Su Gazetinu, sàbadu 2 de santugaine de su 2021

Su Gazetinu OK
Su Gazetinu

Sàbadu, 2 de santugaine de su 2021

Movet in Aristanis “Ottobreventi”

Si faghet ocannu puru, puntuale che a semper, sa rassigna “Oristanottobreventi” cuncordada dae s’Assessoradu de sa Cultura de su Comune de Aristanis. Fintzas a su 31 de santugaine sunt medas is apuntamentos chi faghent parte de su programma e, intra de custos, ddoe at a èssere fintzas Monumentos abertos, chi si torrat a fàghere in Aristanis a pustis de sa firmada pro more de sa Covid-19, e s’inauguratzione de su Teatru Garau, a pustis de is traballos de acontzu.

Custu merie si cumentzat a is chimbe in s’Auditorium de s’Hospitalis Sancti Antoni cun sa de Duas dies regionales de is casteddos e cun sa cunferèntzia intitulada “Dae sa capitale giuigale a s’Unidade de Itàlia. Contributos pro s’avaloramentu de su patrimòniu architetònicu de Aristanis”. Sa cunferèntzia dda contivìgiat s’Istitutu italianu de is Casteddos Onlus – Setzione Sardigna, chi cuncordat sa de Duas dies regionales de is casteddos faghende in Aristanis fintzas bìsitas ghiadas a sa muralla de bia de Sant’Antoni, a sa turre de Marianu II in pratza de Roma, a s’Antiquarium Arborensu in pratza de Giovanni Corrias e a sa turre de Portixedda in bia de Mazzini.

Oe is bìsitas ghiadas ant a cumentzare a is noe oras de mangianu e ant a agabbare a is duas, mentras sa cunferèntzia – comente amus naradu – at a èssere a is chimbe in s’Hospitalis Sancti Antoni.

In su programma de “Ottobreventi” oe ddoe est fintzas sa “Festa de is giajos”. In Aristanis is giajos acumpangiados dae una/u neta/nebode ant a pòdere intrare gratis a s’Antiquarium Arborensu, a sa Pinacoteca comunale “Carlo Contini” e a sa Turre de Marianu II.

Antoni Nàtziu Garau

—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Più informazioni
commenta