Su Gazetinu, chenàbura 1 de santugaine de su 2021
Drones in Sabarussa – Su campu de bòlidu de Sabarussa si càndidat a èssere su logu de riferimentu in Sardigna pro s’addestramentu cun is drones, a manera particulare pro is operadores de is Fortzas de s’òrdine. Annou e annoadura ant a èssere is faeddos-crae in su tempus benidore de s’assòtziu Ulcor (Ultralight Club de Aristanis), chi is progetos suos de giudu si sunt dèpidos firmare pro more de s’emergèntzia de su Coronavirus, ma chi immoe pensat a sa mòvida noa.
S’oferta de is fainas puru at a crèschere, cun una setzione de s’Iscola de bolu de Silìcua e cun s’iscola de parapendiu, chi sunt is novas prus de importu annuntziadas dae su presidente de s’assòtziu, Gian Mario Raimondo Firinu. Intra de is àteros impignos imbenientes de s’assòtziu Ulcor de Sabarussa fintzas su sèberu de una sea noa pro su Campo de bòlidu.
Isport de abba in provìntzia de Aristanis – Mancat pagu a sa de ùndighi editziones de s’Open Water Challenge, filera de apuntamentos isportivos acapiados a su mundu de s’abba e chi ocannu proponet fintzas su Campionadu de su mundu de Formula Kite, prima manifestada pro is Olimpìades de Parigi de su 2024. Pro sa prima borta arribat a Itàlia sa proa mundiale, cun 150 atletas chi lompent dae ònnia continente e chi ant a fàghere a trivas in s’abba de su Golfu de Aristanis. A custos apuntamentos si ddoe ant a agiùnghere is garas de stand up paddle e wing foil, chi ant a cumentzare is fainas de sa biddighedda, su 9 e su 10 de santugaine. Dae s’11 a su 17 de santugaine s’at a fàghere sa prima tapa de su Formula Kite World Championship e pro sa prima borta is atletas professionistas ant a fàghere a trivas sighende is fainas chi si prevident fintzas pro Parigi 2024, cando su kiteboard at a intrare pro sa prima borta in is Olimpìades. Si ddoe sunt iscritos giai unos cantos campiones de su mundu.
In is primas duas dies de abertura de s’Open Water Challenge in sa praja de Turri Manna at a nàschere sa Biddighedda Birde, cun unu muntone de apuntamentos piessignados dae sa sustenibilidade ambientale, dae s’amparu de su logu e de su mare.
Preventzione de is tumores feminiles – “Santugaine in colore de rosa: istima su corpus tuo, faghe preventzione”. Cun custu islogan s’assòtziu Komunque Donne Odv de Aristanis aberit su mese de sa preventzione, cun una parada cuncordada cras a totu die in su Tzentru cummertziale “Porta Nuova”.
Is voluntàrias ant a ispricare fintzas comente totu pòdere fàghere is averiguaduras in Aristanis. At a fàghere fintzas a faeddare in deretura cun is mèigos e s’at a ispàrghere materiale de informu, a manera particulare in contu de s’apoddigadura dae sese e in contu de is fainas de s’assòtziu. Komunque Donne Odv cras etotu at a abèrrere su tesseramentu in sa parada de su Tzentru cummertziale.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta