Giòbia, 30 de cabudanni de su 2021
Catzadores in agiudu de sa fàuna agreste – In is tretos mannos de sartu e de padente de su Monteferru in ue ddoe est passadu su fogu non s’at a pòdere andare a catza pro deghe annos e is catzadores ant a firmare is fainas venatòrias fintzas in is tretos acanta de cussos brusiados.
Dd’at fatu a ischire s’Assòtziu natzionale catza lìbera, chi amegat de si fateriare pro sarvare sa fàuna agreste de cussos logos e pro dare a papare a is animales chi si sunt sarvados, fintzas in logos malos a ddoe arribare.
Chida chi benit ant a ispàrghere àteru foràgiu.
Sa faina est cuncordada paris cun s’agentzia Forestas de Aristanis, chi contivìgiat su pranu de foragiamentu. A logos meda si ddoe at a arribare a pee, ma fintzas a elicòteru, gràtzias a sa disponibilidade de s’Aeronàutica Militare.
Isport in is iscolas – Movet su “Special Olympics European Football Week”, unu progetu de promovimentu de su fùbalu unificadu in is iscolas de ònnia òrdine e gradu. In Aristanis ddoe ant pigadu parte is dirigentes Marilina Meloni de s’Istitutu tècnicu “Mossa”, Gian Domenico Demuro de s’Istitutu “Don Deodato Meloni” e Pino Tilocca de s’Istitutu “De Castro”.
Cuncordada dae s’assòtziu Special Olympics, s’initziativa dd’ant presentada in s’auditorium de su “Mossa”, presente fintzas su responsàbile de su setore isportivu de s’Ufìtziu iscolàsticu territoriale de Aristanis (e responsàbile regionale de is progetos de Special Olympics), Salvatore Melis.
A is fainas isportivas ddoe ant a pigare parte formatziones misturadas de giòvanos cun e sena de disabilidades intelletivas.
S’isport unificadu est sa manera mègius pro fàghere a cumprèndere valores de importu comente a s’inclusione e s’amigàntzia, cumpartzende giogu e ispàssiu.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta