Su Gazetinu, mèrcuris 29 de cabudanni de su 2021
Ancoras fogu in Pianalza e in Monteferru – Àteros fogos in Pianalza e in Monteferru, in ue sa liaga de s’istadiale – a dolu mannu – no est agabbada ancoras. Eris su fogu at interessadu su sartu de Cùglieri e cussu de Sàgama. In is dies passadas àteros fogos fiant mòvidos in sartu de Sune. Fintzas eris, pro domare su fogu, est tocadu a fàghere intervènnere elicòteros e iscuadras meda de istudadores in terra.
Epidemia di Limba biaita – S’epidemia de Limba biaita s’isparghet e in Sardigna est totu unu trèulu. Sa denùntzia grave dd’at fata su deputadu aristanesu Lucianu Cadeddu, de su Movimentu de is 5 Isteddos, chi faghet parte de sa Cummissione pro s’Agricultura de sa Càmera. Su parlamentare sardu at domandadu interventos lestros a sa Regione e, a manera particulare, a s’Assessoradu de sa Sanidade, pro firmare s’impestu de su bestiàmene de is siendas sardas.
Is màndigos de su connotu bolent amparados – Is consigieris regionales de su grupu de is Riformadores proponent una lege chi amparet is màndigos de su connotu de is comunes de sa Sardigna. Sa faina dd’ant presentada in Casteddu e at giai regortu su parre positivu de is comunidades de Làconi, Ilartzi, Àllai, Asuni, Samugheo, Arborea e Cùglieri, chi ant propostu unos cantos màndigos de cussos logos.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta