Su Gazetinu, mèrcuris 22 de cabudanni de su 2021 - LinkOristano
Su gazetinu

Su Gazetinu, mèrcuris 22 de cabudanni de su 2021

Su Gazetinu

Su Gazetinu OK
Su Gazetinu

Mèrcuris 22 de cabudanni de su 2021

Iscolas de bàrdia – No at a èssere de òbligu e no at a èssere vinculante su de pigare parte a is averiguaduras prevìdidas in is chi ddis narant “Iscolas de bàrdia”, iscolas chi ant a permìtere de iscoviare sa presèntzia de sa Covid-19 intra de is bangos. Is mammas e is babbos ant a seberare si dare sa disponibilidade pro chi is fìgios fatzant parte de su campione de pitzocheddos chi si sutaponet a is averiguaduras.

Is Istitutos cumprensivos de sa provìntzia de Aristanis puru ant retzidu unu documentu dae s’Ufìtziu iscolàsticu regionale. E ant a dèpere torrare isceda a intro de lunis de chida chi benit.

Arborea, sagra de sa pulenta – A pustis de un’annu de firmada pro more de sa pandemia, in custu atòngiu in Arborea diant pòdere torrare a cuncordare sa sagra de sa pulenta. Dd’at fatu a ischire sa Pro loco, ghiada dae su presidente Paolo Sanneris.

Sa punna de s’assòtziu est cussa de cuncordare sa manifestatzione intra de s’agabbu de su mese de santugaine e su cumentzu de su mese de onniasantu. Ma sa sorte de sa sagra, ocannu puru, est ligada a comente totu at a andare s’emergèntzia pro su Coronavirus. Intra de is àteras cosas, si pensat de cuncordare fintzas sa mustra zootècnica, chi dae semper si faghiat in beranu e immoe si diat pòdere fàghere, forsis, a s’agabbu de su mese onniasantu.

Tirotzìnios – In sa Prefetura de Aristanis naschet un’oportunidade de tirotzìniu pro is istudiantes de sa Facultade de Sièntzias econòmicas, giurìdicas e polìticas de s’Universidade de Casteddu. Su prefetu de Aristanis, Fabrizio Stelo, at firmadu una cunventzione cun su prèside de sa Facultade, pro permìtere a is dischentes de fàghere tirotzìnios de formatzione e orientamentu in Aristanis.

In sa Prefetura ant sutaliniadu s’importu de abèrrere is istitutziones a su mundu de is istudiantes, prus che totu a cussos de s’Universidade.

Dante in Aristanis – S’Assessoradu de sa Cultura de su Comune de Aristanis e sa Fundatzione Aristanis pigant parte a is “Dies europeas de su Patrimòniu” cun una cunferèntzia dedicada a Dante Alighieri, cuncordada a manos de pare cun sa Cambarada FAI de Aristanis. Sàbadu chi benit, a is ses de merie, in s’Antiquarium Arborensu, prof.re Raimondo Zucca at a contivigiare sa cunferèntzia intitulada “Lo buon Marzucco Forte in Arestano. Cando in su tempus de Marianu II unu personàgiu de sa Divina Cummèdia biviat in Aristanis”.

S’addòbiu est fintzas unu de is apuntamentos de su progetu “Divina Sardigna”, pensadu e cuncordadu dae totu is delegatziones e is cambaradas FAI de sa Sardigna.

Antoni Nàtziu Garau

—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Più informazioni
commenta