Su Gazetinu, martis 21 de cabudanni de su 2021
Aristanis, villa Lionora – Su Comune de Aristanis at agiudicadu a s’impresa de fràigos Caredda de Cuartu Sant’Aleni s’apaltu pro assentare su giardinu e sa villa “Lionora de Arbaree”, cun s’assentu fintzas de s’intrada in guturinu II de Volta. S’impresa at a dèpere agabbare is traballos in 210 dies naturales e de sighidu.
Sa faina interessat sa periferia est de Aristanis, in sa bia chi portat a sa fratzione de Silì, e pertocat su guturinu II de Volta, is pratzas de sa domo de pàusu “Lionora de Arbaree” e sa villa “Lionora de Arbaree”.
Villa Lionora dd’ant a dedicare a fainas culturales, mentras guturinu II de Volta at a èssere una bia urbana de intrada e ligàmene cun su parcu agrìculu nou de su progetu generale Aristanis Est.
Aristanis, diretivu nou in sa Soms – Marco Faedda est su presidente nou de sa Sotziedade Operaia de Agiudu Pare-pare (SOMS). Dd’ant elègidu a s’agabbu de s’assemblea generale in sa sea de sa Soms.
Su diretivu nou, chi at a abarrare in càrriga in is tres annos 2021/2024, est formadu fintzas dae su vitze-presidente Gianluca Mannai, dae su cascieri Andrea Mattana e dae is consigieris Antonello Pinna, Pierpaolo Regoli, Oscar Migliorini, Marco Diliberto, Vincenzo Saba, Giusppe Frau, Salvatore Pisanu, Filippo Sarais e Christian Pinna. A sìndigos revisores ant elègidu a Antonio Orrù, Giuliano Rosmarino, Edmondo Nurra, Francesco Federico e Domenico Sanna.
Angelo Zucca est su segretàriu nou e Egidio Cocco su regollidore.
Passigiada ecològica – S’Assessoradu de s’Ambiente de su Comune de Aristanis cuncordat una passigiada ecològica. S’apuntamentu est pro sàbadu chi benit, cun addòbiu de is caminadores a is bator de merie e mòvida a is bator e mesu dae pratza de Roma. Sa faina faghet parte de su programma de sa de binti Chidas europeas de sa mobilidade sustenìbile, promòvidu e cuncordadu a livellu natzionale dae su Ministeru de su Tramudu ecològicu.
Is caminadores ant a caminare in un’àndala de 8 chilòmetros e ant a pòdere gosare de s’agiudu de sa cambarada de caminadores lestros Alea di Oristano e de s’Assòtziu natzionale de is atletas diabèticos.
Antoni Nàtziu Garau
commenta