Lunis, 20 de cabudanni de su 2021
In Aristanis su fèstival “Leghende ancoras impare” – Su fèstival “Leghende ancoras impare” lompet a sa de deghe editziones e previdet bator dies dedicadas a is deretos umanos. Su primu apuntamentu at a èssere giòbia 23 de cabudanni, s’ùrtimu domìnigu 26. Sa rassigna s’at a fàghere in s’Hospitalis Sancti Antoni de Aristanis. Su fèstival at a èssere cundidu cun literadura, informatzione, tzìnema, mùsica e teatru. In programma fintzas unu muntone de fainas chi ant a interessare is iscolas de sa tzitade. “Leghende ancoras impare” est unu progetu pensadu dae Marina Casta e cuncordadu dae s’assòtziu culturale Heuristic.
Denuntziadu dae is Carabineris – Mancari non s’esseret pòdidu transire foras dae su comune suo, unu pitzocu de 21 annos residente in Mòguru est essidu foras dae bidda e s’est presentadu imbriagu a s’istatzione de is Carabineris de Biddacidru. Su giòvanu at domandadu de nche ddu torrare a acumpangiare a Mòguru, pro ite ca no ischiat comente ddoe pòdere torrare. A s’òmine dd’ant denuntziadu in istadu de libertade a sa Procura de sa Repùblica.
Rodas in s’istòria – Otanta veturas antigas sunt passadas in sa provintziale S’Alighera-Bosa pro sa tapa sarda de “Rodas in s’istòria”. S’isfilada de màchinas antigas dd’ant fata eris e dd’ant cuncordada s’Automòbile Club de Tàtari a manos de pare cun Aci Istòricu, cun su patrotzìniu de is Comunes de S’Alighera e de Bosa.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta