Su Gazetinu, domìnigu 5 de cabudanni de su 2021 - LinkOristano

Su Gazetinu, domìnigu 5 de cabudanni de su 2021

Su Gazetinu

Su Gazetinu OK
Su Gazetinu

Domìnigu 5 de cabudanni de su 2021

Ancoras festa manna pro s’isport de sa provìntzia de Aristanis – Ancoras festa pro s’isport de sa provìntzia de Aristanis, a pustis de is medàllias conchistadas in is Olimpìades, gràtzias a sa bìnchida de sa natzionale italiana de volley in is europeos, cun s’agiudu fintzas de Alessia Orro, sa giogadora de Narabuia, chi at giogadu fintzas in s’Ariete de Aristanis.

Eris a merie is asulas ant conchistadu su tìtulu de campionas de Europa. In sa finale de Belgradu, nche ant furriadu a is meres de domo de sa Sèrbia cun su resurtadu de agabbu de 3-1.

Est sa de tres bortas chi sa pallavolo italiana de is fèminas resurtas campiona de Europa, a pustis de is editziones in Lussemburgu/Bèlgiu de su 2007 e in Polònia in su 2009.

Chimbe disterrados afghanos acasagiados in provìntzia de Aristanis – A pustis chi, pro more de su mare malu, sunt arribados cun agiomai tres oras de atràssiu a su portu de Casteddu, 5 afghanos, totus òmines giòvanos, intra de is 79 assignados a sa Sardigna ant a agatare acasàgiu in provìntzia de Aristanis, pro immoe in s’istrutura de Sini. Cras o pusticràs, però, is chimbe giòvanos ant a tramudare a Norghiddo. In Sini, difatis, diant dèpere acasagiare famìllias cun pipios e is autoridades narant chi àteros disterrados diant pòdere arribare in is dies imbenientes.

Su presidente de sa Regione Christian Solinas at decraradu chi “su Pòpulu sardu no nche at a furriare sa cara a s’àtera ala in dae in antis de sa suferèntzia chi tzitadinos meda afghanos sunt connoschende pro more de unu regime totalitàriu. Sa Sardigna at a fàghere sa parte sua: est presente cun un’atentu particulare pro is famìllias, pro is fèminas, pro is antzianos e pro is pipios chi si nche depent fuire dae unu logu sena de libertade. Su bonucoro in is cunfrontos de su Pòpulu afghanu est unu dovere”.

Is disterrados, a pustis de is averiguaduras mèigas, ddos ant a partzire fintzas cunforma a su disìgiu issoro de abarrare paris cun is parentes.

Antoni Nàtziu Garau

—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Più informazioni
commenta