Su Gazetinu, giòbia 5 de austu de su 2021 - LinkOristano
Su gazetinu

Su Gazetinu, giòbia 5 de austu de su 2021

Su Gazetinu

Su Gazetinu OK

Giòbia 5 de austu de su 2021

Emergèntzia pro su fogu – Ant a arribare a lestru is primos sucurros pro famìllias e siendas chi ant tentu dannos dae su fogu chi at degolliadu su Monteferru e sa Pianalza. Dd’at asseguradu su presidente de sa Regione Christian Solinas, eris in Cùglieri, in ue at fatu un’addòbiu cun is sìndigos de is Comunes interessados. Su presidente at naradu chi s’at a chircare de agiudare fintzas a is privados chi non tenent Partida IVA chi ant tentu dannu dae su fogu a is olivàrios issoro. In fines, Solinas at cunfirmadu sa nàschida de unu paru de Unidade de crisi chi at a coordinare is interventos e chi sa sea sua at a èssere in Cùglieri.

Su Pallosu, colònia de gatos: nudda bìsitas – Sa colònia de gatos de Su Pallosu serrat is bìsitas ghiadas. Su responsàbile Andrea Atzori at naradu chi sa detzisione dd’ant dèpida pigare pro more de problemas de organizatzione e de is impèigos pro arribare a sa praja ingendrados dae sa barriera cuncordada pro amparare sa costera dae is freaduras de sa roca.

Santa Justa, interru de Ignazio Manca – S’at a fàghere custu merie a is chimbe, in Santa Justa, s’interru de Ignazio Manca, s’òmine chi dd’ant agatadu mortu in domo sua. In s’interis, sighint is iscrucullos de sa Procura de sa Repùblica pro iscobèrrere su pro ite de sa morte. Su frade de Ignazio Manca, Carmine, est indagadu pro omitzìdiu, ma si decrarat notzente. Su procuradore de sa Repùblica, Ezio Domenico Basso, at naradu chi s’iscritzione sua in su registru de is indagados est una chistione tècnica, de òbligu, pro permìtere de fàghere averiguaduras urgentes chi non faghet a repìtere.

Antoni Nàtziu Garau

—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

commenta