Martis, 3 de austu de su 2021
Santa Justa, indagadu pro sa morte de su frade – Ddoe at un’indagadu pro sa morte de Ignazio Manca, acontèssida in Santa Justa sàbadu passadu. Est su frade Carmine, pensionadu, imputadu immoe de omitzìdiu. S’òmine, però, at decraradu de non ddoe intrare nudda cun sa morte de su frade. Custu mangianu a Santa Justa ddoe sunt torrados is Carabineris de su RIS pro àteras averiguaduras. Eris a merie a su corpus de Ignazio Manca dd’ant fatu s’autopsia.
Matigheddas de olia donadas dae Salmo – Su cantante Salmo at donadu 10.000 matigheddas de olia pro agiudare a nde torrare a istantargiare una partighedda de su patrimòniu destruidu dae su fogu mannu chi at brusiadu su Monteferru e sa Pianalza in is dies passadas. Su Comitadu provintziale de sa Rughe Ruja de Aristanis si nde at a incurare de partzire is matigheddas.
Covid, impestos noos – Impestos noos de Coronavirus in provìntzia de Aristanis. In custas oras is Amministratziones locales ant fatu a ischire de àteras positividades. Sa situatzione chi ponet prus pistighìngiu est cussa de Terraba, in ue su nùmeru de is positivos a sa Covid-19 est lòmpidu a 56. Àteros 8 impestos ddos ant iscobertos in Santa Justa, in ue dae su mese de làmpadas non ddoe aiat prus positivos. In fines, àteros 6 positivos nde sunt essidos a pìgiu in Crabas.
Antoni Nàtziu Garau
commenta