Giòbia, 29 de trìulas de su 2021
Iscrucullos in contu de su fogu – Sunt bator is iscrucullos incarrerados dae sa Procura de sa Repùblica de Aristanis pro iscobèrrere is responsabilidades de is fogos de sàbadu in provìntzia de Aristanis. A prus de unu fascìculu pro su fogu mannu chi at interessadu su Monteferru e sa Pianalza, un’àteru fascìculu dd’ant abertu pro su fogu intra de Marmidda Arta e Grìghini (Useddus e Biddobrana), unu pro cussu chi fiat acostende a sa bidda de Crabas e unu pro su fogu mòvidu in sartu de Sèneghe.
Cùglieri, agiudos – Su Comune de Cùglieri at domandadu de firmare pro immoe is agiudos alimentares. Is donatziones sunt aici medas de àere ingendradu carchi problema logìsticu. Fintzas is iscortas de foràgiu sunt bastantes, pro immoe, e dae oe ddas at a gestire unu tzentru de regorta de s’Amparu tzivile in Otzana.
Is Arutas, chircant de furare unu pagheddu de arena – Una còpia de turistas de Salernu, chi bivet in provìntzia de Bèrgamu e chi est in vacàntzia in Sardigna, at chircadu de nde furare un’ampuddita de arena dae sa praja de Is Arutas (Crabas), ma dd’at firmada sa Politzia munitzipale de Crabas, chi dd’at postu 1.000 èuros de contraventzione. A is turistas chi si sunt atrividos de nde furare s’arena ddos at signalados a sa Politzia un’àtera turista, chi si nd’est acatada de sa faina mala chi amegaiant de fàghere.
Santeru, parchègios a pagamentu – Sàbadu at a incarrerare in is prajas de Santeru su servìtziu de parchègios a pagamentu. Si previdet fintzas su cuncordu de turrigheddas pro su sarvamentu in mare.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta