Mèrcuris, 28 de trìulas de su 2021
Fogu – Sa Procura de sa Repùblica de Aristanis at abertu un’iscrucullu pro fogu culposu e dolosu e at apostivigadu averiguaduras in contu de su fogu mannu chi at interessadu su Monteferru e sa Pianalza. In s’interis, sighint oe puru is fainas de bonìfica de su fogu pro evitare chi potzat torrare a iscapare. Ddoe sunt traballende ancoras is aparèchios. Eris unu messàgiu de solidariedade e bonucoro a sa populatzione chi at tentu dannu mannu est lòmpida dae su Presidente de sa Repùblica Sergio Mattarella. E sunt medas sas fainas incarreradas pro regòllere dinari pro agiudare a chie nche at pèrdidu totu. Oe in Consìgiu regionale at a acabbare su dibatu abertu eris in contu de s’emergèntzia pro more de su fogu.
Santeru, massaju morit in un’intzidente – Eris in Santeru est mortu unu massaju: s’est intesu male cando fiat ghiende su tratore suo, chi nch’est iscutu a unu muru. Ddi naraiant Ottavio Broccias e teniat 57 annos.
Fèminas e violèntzia – In sa Cuestura de Aristanis ant inauguradu un’aposentu pro is fèminas vìtimas de violèntzia. S’aposentu at fatu a ddu cuncordare gràtzias a su Soroptimist, a manos de pare cun su Ministeru de is Internos e cun s’agiudu de unos cantos entes.
Trenu – Istorbos mannos eris pro is biagiadores de su trenu de a merie Tàtari-Casteddu. A su trenu dd’est tocadu a si firmare in su deretu de Bòrore e de Aristanis pro unu guastu tècnicu, faghende ritardu mannu.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta