Martis, 27 de trìulas de su 2021
Emergèntzia pro su fogu – Su fogu mannu chi at degolliadu sa Pianalza e su Monteferru dd’ant firmadu, ma is fainas de istudadura sighint pro transire s’arriscu chi su fogu torret a iscapare, pro more de su bentu, comente est acontèssidu notesta in Tresnuraghes e in Santu Lussurzu e, custu mangianu, ancoras in Santu Lussurzu. Is aparèchios Canadair ant a abarrare ancoras in zona e ant a agiudare is iscuadras de istudadores formadas dae medas voluntàrios. Sunt giai mòvidos is iscrucullos pro averiguare is responsabilidades de su fogu. Paret chi siat mòvidu dae un’àteru fogu, acontèssidu in Bonàrcadu chenàbura a merie e chi at torradu a iscapare sàbadu a mangianu, ismanniende in presse su fronte suo e brusiende prus de 10.000 ètaros de padentes seculares e pasturas, minetzende fintzas bator o chimbe biddas.
In s’interis si comintzant a contare is dannos mannos e est mòvida una faina ispantosa de bonucoro e solidariedade. Agiudu e promissas de agiudu arribant dae entes e assòtzios meda, ma fintzas dae medas tzitadinos. In is pàginas de su giornale nostru s’agatant is riferimentos pro pòdere fàghere is donatziones.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta