Lunis, 26 de trìulas de su 2021
Fogu in Monteferru: unu pagheddu de istuda – A pustis de 48 oras su caminu de su fogu mannu chi dae sàbadu a mangianu est degolliende is territòrios de su Monteferru, de sa Pianalza e de su Màrghine si firmat. Su sìndigu de Iscanu Antonio Flore at annuntziadu chi su fronte de su fogu acanta de bidda sua e a làcana cun su Monte de Sant’Antoni at lassadu istuda.
“Tzertu, sa situatzione abarrat semper perigulosa, pro ite ca su fogu diat pòdere torrare a mòvere totu in una”.
Cussu intra de Iscanu, Sindia e Sàgama est immoe su fronte prus perigulosu de su fogu. In Santu Lussurzu e in Cùglieri, minetzadas dae su fogu in sa note intra de sàbadu e domìnigu, sa situatzione como est torrende a sa normalidade e amegant de si fàghere is fainas de bonìfica.
Novas bellas fintzas dae Tresnuraghes, in ue nche sunt resèssidos a firmare su caminu de su fogu in su rimboschimentu a subra de sa borgata marina de Porto Àlabe: a su note su fogu aiat torradu a mòvere.
“Sa situazione non ponet pistighìngiu”, cunfirmat su sìndigu Gian Luigi Mastinu, chi amegat de sighire is fainas de istudadura.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta