Su Gazetinu, domìnigu 25 de trìulas 2021 - LinkOristano
Su gazetinu

Su Gazetinu, domìnigu 25 de trìulas 2021

Su Gazetinu OK
Su Gazetinu

Domìnigu, 25 de trìulas 2021

Brùsiat sa provìntzia de Aristanis. Non lassat istuda su fogu in Monteferru – A pustis de duas dies de fogu de tìmere chi at turmentadu su Monteferru, sighit s’allarme e su pistighìngiu in sa parte otzidentale de su monte e in Pianalza, ma fintzas, ancoras, in Santu Lussurzu e in Iscanu (chi est inghiriada dae su fogu). Is duas biddas, difatis, sunt torra minetzadas dae su fogu, chi s’est torradu a abbiatzare gràtzias a su bentu de sole forte chi est tirende, a pustis chi eris a note aiat minetzadu fintzas sas biddas de Cùglieri, Sinnarìolo e Porto Àlabe, fratzione de Tresnuraghes. Intra de Santu Lussurzu, Cùglieri, Sinnariolo e Porto Àlabe sunt prus de 300 is persones chi ant dèpidu lassare is domos issoro pro seguresa. Mobilitatzione manna de mezos (cussos aèreos chi ddoe sunt intervenende sunt una bindighina e, intra de custos, ses aparèchios Canadair) e de òmines e fèminas de is Vìgiles de su Fogu, Corpus Forestale, Forestas, Barratzellos, voluntàrios e tzitadinos privados, cun dosinas de iscuadras de istudadores in terra. Un’agiudu mannu est lompende fintzas dae s’Amparu tzivile regionale.

Àteru allarme mannu eris intra de Monte Arci e Grìghini pro unu fogu chi, traessende su territòriu de su Comune de Useddus, nd’est caladu ispintu dae su bentu a sartu de Biddobrana, in ue a su note at minetzadu is primas domos de sa periferia est de sa bidda. Ancoras a is chimbe de mangianu in cussos bighinados amegaiat de ddoe passare una màchina de su Comune chi avisaiat a is tzitadinos a si preparare a lassare is domos issoro pro seguresa. Chentinas sos òmines de sas iscuadras de istudadores e sos voluntàrios chi ant traballadu pro totu sa note. Gràtzias a s’interventu a is sete de mangianu de duos Canadair e de una pariga de elicòteros de sa flota aèrea regionale (chi a su note non podiant bolare), paris cun is mezos de terra, nche sunt resèssidos a domare su fogu. Ma is fainas de bonìfica sighint ancoras.

Solu eris su fogu si nche at papadu in provìntzia de Aristanis prus de 10.000 ètaros de territòriu, su prus de padentes seculares. Si su dannu ambientale est istremenadu, cussu in sa carrera econòmica est ancoras chitzo pro ddu contare (is siendas interessadas, difatis, sunt dosinas e dosinas: is istaddas e is pasturas brusiadas e su bestiàmene mortu non si contat!). Su presidente de sa Regione Christian Solinas at domandadu a su Guvernu istatale agiudos econòmicos lestros e chi una parte de is finantziamentos de su PNRR siat posta pro sa forestatzione noa.

Antoni Nàtziu Garau

—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

 

commenta