Chenàbura, 23 de trìulas de su 2021
Basca meda – Undada noa de basca meda in Sardigna. Interessada fintzas sa provìntzia de Aristanis. Si prevident temperaduras chi ant a propassare is 40 grados. S’Amparu tzivile de sa Sardigna at bogadu un’avisu de cunditziones mèteu perigulosas chi balet dae oe fintzas a domìnigu chi benit.
Lassapassare birde – Dae su 5 de austu at a èssere de òbligu su lassapassare birde pro intrare a unas cantas genias de locales in logu serradu, intra de custos tzilleris e ristorantes, cando est a si ddoe istentare sètzidos pro bufare e/o papare. No at a serbire, imbetzes, pro bufare istantàrgios in su bancone.
Prontu sucursu – Serradu s’àtera die pro sa presèntzia de sete malàidos resurtados positivos a sa Covid-19, su Prontu sucursu de s’ispidale de Santu Martinu de Aristanis dd’ant torradu a abèrrere eris a merie cun operatividade prena. Is locales de su Prontu sucursu ddos ant sanificados.
Simaghis, autovelox – In Simaghis dae lunis chi benit at a cumentzare a funtzionare s’autovelox pro mesurare sa velotzidade istradale. S’impiantu dd’at cuncordadu su Comune e s’agatat in s’intrada de sa bidda pro chie benit dae Aristanis. Sa velotzidade màssima permìtida est de 50 chilòmetros a s’ora.
Antonio Ignazio Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta