Giòbia, 22 de trìulas de su 2021
Emergèntzia Coronavirus: abertu a metade su Prontu sucursu de Aristanis – Su Prontu sucursu de s’ispidale de Santu Martinu de Aristanis, serradu eris a merie pro sa presèntzia de chimbe malàidos resurtados positivos a su Coronavirus, chi si nde ddoe at atzuntu a pustis àteros duos, at torradu a abèrrere a metade. S’Assl de Aristanis racumandat a sa populatzione, fintzas a cando no ant a agabbare is fainas de sanificatzione de is locales, de si nde serbire solu pro apretu mannu e pro is urgèntzias. Sa sanificatzione s’at a fàghere fintzas in su repartu de Radiologia de s’ispidale, in ue ddoe sunt passados in cue puru unos cantos malàidos positivos a su virus.
In s’interis, in provìntzia de Aristanis puru creschet su nùmeru de is positivos a su Coronavirus. In Crabas su Comune at fatu ischire de àteros 7 impestos, chi s’atzunghent a is 4 giai iscobertos e, duncas, sunt 11 in totu. Un’impestu nd’est essidu a pìgiu fintzas in Bauladu, in ue dae chimbe meses non ddoe sunt istados positivos. Tres impestos fintzas in Ardaule, a intro de una famìllia. In fines, un’àteru positivu in Bosa, ligadu a s’infermiera de s’ispidale chi est resurtada positiva a sa torrada de unu biàgiu foras de Itàlia.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta