Mèrcuris, 21 de trìulas de su 2021
Su Gazetinu
Sinis, furas – Allarme in is prajas de su Sinis in ue is furuncos, su chi in italianu ddis narant “sòrighes de màchina”, ant comintzadu a abèrrere is veturas firmas cun sa punna de nde furare carchi cosa. In una chida sunt giai paritzas is màchinas de turistas chi ant abertu a fura. Is primas furas sunt acontèssidas in su territòriu de Crabas, in is Arutas e in Santu Giuanni. Is furuncos ant segadu is bidros de is veturas e nd’ant furadu màchinas fotogràficas e computer. Intra de sàbadu e domìnigu àteras duas furas sunt acontèssidas acanta de Putzu Idu.
Bonàrcadu, fogos – Eris est mòvidu unu fogu in sartu de Bonàrcadu, in Perda Caddos. Sa sala operadora de sa Forestale ddoe at mandadu s’elicòteru de su Corpus Forestale de sa base de Fenosu. Dae terra s’istudadura dd’ant contivigiada is patùllias de su Corpus Forestale de Sèneghe e unas cantas àteras iscuadras de istudadores. Un’àteru fogu, semper eris ma a meritzeddu, est mòvidu in Massa. Dd’ant domadu sos òmines de sa Forestale e cussos de s’Agentzia Forestas.
Aristanis, domo isderrocada – Nde dd’ant isderrocada sa villeta abusiva fraigada in unu lotu de sa periferia de Aristanis, in sa tzircunvallatzione chi portat a Silì, e chi martis nde dd’aiat issucutada sa Giustìtzia. Su fàbbricu dd’aiat fatu s’imprendidore e ex maresciallu Tonino Urru, titulare de sa sotziedade Edilservice. Sa faina de isderrocu dd’at contivigiada su Corpus Forestale a tenore de su disponimentu de sa Procura generale de Casteddu, ghiada dae Carlo Moi. S’imprendidore nd’aiat istantargiadu sa domo sena de respetare sa normativa regionale prevìdida dae su Pranu paesagìsticu.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta