Martis, 20 de trìulas de su 2021
Su Gazetinu
Cùglieri – Addòbiu pùblicu cras in Cùglieri pro nde istantargiare unu comitadu promovidore de su marcu Igp pro sa panada de su connotu. S’addòbiu s’at a fàghere in sa sala de su teatru de su seminàriu betzu, a is 11.00
Sa faina movet dae s’assòtziu culturale “Sa Mata – L’albero delle idee”, de acòrdiu cun s’Amministratzione comunale de Cùglieri e cun s’agiudu de s’agentzia regionale Laore.
Festa in Nuraxinieddu – Nuraxinieddu puru torrat a cuncordare sa festa pro su patronu suo, Santu Jacu. Ocannu passadu, pro more de is proibimentos ligados a sa pandemia, sa festa tzivile non si fiat pòdida fàghere. Ocannu, imbetzes, si torrat a cuncordare. Sàbadu e domìnigu chi benit, 24 e 25 de trìulas, in programma una cummèdia in limba sarda e unu cuntzertu rock.
Crucuris – Movet su programma pro s’istadiale in Crucuris: libros, tzìnema, fotografia, mùsica e arte ant a acumpangiare pro unu mese e mesu is dies de sa bidda, in ue s’at a fàghere unu fèstival de sa comunidade in contu de su raportu intra de òmine e natura. Totu ingredientes pro torrare a abbiatzare sa cultura me in sa biddighedda de treghentos bividores, in su coro de sa Marmidda Arta, a pustis de is momentos prus malos de sa pandemia.
Antoni Nàtziu Garau
commenta