Chenàbura, 16 de trìulas de su 2021
Sanidade, chèscia noa – Is Comunes si torrant a chesciare pro annoare s’atentu in contu de sa chistione de sa sanidade. Is Consìgios comunales de totu sa provìntzia de Aristanis torrant a manifestare contras de sa paràlisi de is servìtzios de is ispidales e de cussos territoriales. Giòbia 22 de trìulas in s’àrea de servìtziu de Tramatza, in s’Istatale 131, ant a addobiare is delegatziones de is assembleas tzìvicas de totu is 88 comunes de sa provìntzia, chi a pustis ant a ocupare sa carregiada de s’Istatale. S’istorbu pro is automobilistas at a èssere pagu, pro ite ca su tràficu dd’ant a fàghere passare in is bias segundàrias cumplanares. Is Sìndigos e is Consìgios comunales domandant chi totu is repartos de s’ispidale de Santu Martinu torrent a funtzionare bene, ma fintzas cussos de is ispidales de Bosa e de Ilartzi. Ma sa chèscia si faghet fintzas pro s’amparu de su deretu a is curas de base, oramai comprumìtidu pro more de s’ismèngua grae chi at sufridu sa retza de sa meighina genèrica e ispetzialìstica.
Contributos cun su bandu (R)esistu – Is finantziamentos de su bandu (R)esistu si podent otènnere in antìtzipu. S’Assessoradu regionale de su Traballu at comunicadu chi impresas e traballadores autònomos ant a pòdere otènnere un’antìtzipu fintzas a su 60 % de su contributu assignadu. Su provedimentu pertocat totu cuddos chi faghent parte de is elencos de assignadura giai aprovados e publicados in sa pàgina a s’aposta de su portale de sa Regione Sardigna. Is domandas si podent mandare – cun su SIL – a s’Assessoradu regionale de su Traballu cumentzende dae martis chi benit, 20 de trìulas.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta