Giòbia, 15 de trìulas de su 2021
Emergèntzia Coronavirus – Creschet su pistighìngiu pro s’ampulada in artu de is impestos de Coronavirus. Eris, in Itàlia isceti, nde sunt essidos a pìgiu 2.153 impestos, unu nùmeru artu meda chi no acontessiat dae su 6 de lampadas. In Sardigna in is ùrtimas 24 oras is positividades noas sunt istadas 135, apenas deghe dies a oe fiant noe isceti.
In provìntzia de Aristanis averiguaduras particulares si sunt faghende in Abbasanta. In sa bidda de Guiltzier ses tampones sunt resurtados positivos e, duncas, su nùmeru de is positivos est crèschidu de tres bortas. Sunt comente si siat impestos ligados a istrintu a cuddos tres iscobertos in Abbasanta in is dies passadas.
In Sardigna però, pro como, no est in arriscu sa zona bianca. S’ìsula, mancari contet 21 impestos ònnia 100.000 bividores, tenet su 0,5% de letos de is repartos de rianimatzione ocupados dae malàidos de Covid-19.
S’assessore regionale de sa Sanidade Mario Nieddu at domandadu a su Guvernu de torrare a pònnere manos in is critèrios de assignadura de is fascas, pro ite ca sa populatzione in s’istadiale, in Sardigna, no est prus de 1,6 milliones, comente in s’ierru. Difatis, in custu contu non ddoe ant postu a is turistas.
In s’interis, s’assessore regionale de su Turismu Gianni chessa at abertu a sa possibilidade de s’impreu de su lassapassare birde pro intrare a tzilleris e ristorantes; custu pro amparare s’istajone turìstica.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta