Mèrcuris, 14 de trìulas de su 2021
Emergèntzia pro su fogu – Un’àtera die de emergèntzia eris in provìntzia de Aristanis pro more de unos cantos fogos. Difatis, est torradu a mòvere su fogu in Abbasanta, intra de padentes, paschidòrgios e olias acanta de sa bidda. Su fogu dd’aiant bintu a s’arbeschidòrgiu de eris, ma agiudadu dae su bentu estru chi s’est pesadu s’est torradu a abbiatzare.
Ddoe sunt intervènnidos bator elicòteros e duos aparèchios Canadair. Gherrende contras de su fogu ddoe fiant fintzas deghe iscuadras de s’Agentzia Forestas e un’iscuadra de voluntàrios de s’assòtziu Aristanis Voluntàrios Sardigna Tzentrale, a prus de is Vìgiles de su Fogu.
Fogu fintzas in sartu de Bosa, a pagu tretu dae is prajas nòdidas de S’Abba Druche e Cumpultitu, in sa bia istatale intra de Bosa e S’Alighera. Su Corpus Forestale est intervènnidu cun un’elicòteru. A pustis est arribadu un’àteru elicòteru dae Fàrcana e unu Canadair lòmpidu dae sa penìsula. A sa faina de istudadura ddoe ant pigadu parte fintzas tres iscuadras de Forestas, is Barratzellos, un’iscuadra de is Vìgiles de su Fogu, is Vìgiles urbanos e is voluntàrios de sa Rughe ruja e de s’Amparu tzivile.
Semper eris fogu fintzas in Masuddas, in Abba Rossa, in is costeras de Santa Justa, in Tzeddiani e in Sabarussa.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta