Su Gazetinu, martis 13 de trìulas de su 2021 - LinkOristano
Limba sarda

Su Gazetinu, martis 13 de trìulas de su 2021

Su Gazetinu

Su Gazetinu OK

Martis, 13 de trìulas de su 2021

Emergèntzia pro su fogu in provìntzia de Aristanis – Est sighida fintzas a su note sa faina de istudadura de su fogu mannu chi eris est mòvidu in Sant’Agustinu, in sartu de Abbasanta. Eris a merie si sunt bìvidas iscutas de timoria manna. Is fortzas de s’òrdine ant dèpidu fàghere evacuare a 25 pipios dae una colònia de istadiale e, a pustis, a àteros 48 dae unu campu scout. A is pipios ddos ant acasagiados in sa borgada de Santu Lenardu e in su Caip, su tzentru de formatzione de sa Politzia chi s’agatat in Abbasanta.

Pro domare su fogu, s’Amparu tzivile nd’at istantargiadu una màchina ispantosa: bator aparèchios Canadair, bator elicòteros, prus de baranta iscuadras intra de Corpus forestale, operajos de Forestas, Vìgiles de su fogu, barratzellos, àteros voluntàrios lòmpidos dae totu sa zona de Guiltzier, Barigadu e Monte Ferru.

Sa faina de istudadura no est istada simpre, pro more de is cunditziones mèteu particulares: temperaduras artas meda chi eris in su tzentru de sa Sardigna sunt lòmpidas a 40 grados e bentu.

Un’àteru fogu est mòvidu semper eris acanta de Milis. In cue puru pistighìngiu mannu. Is iscuadras de istudadores ant cumentzadu luegos a ddi parare fronte, transende s’arriscu chi su fogu, chi at interessadu unu tretu de sartu acanta de sa provintziale chi portat a Sèneghe, esseret arribadu a bidda.

Antoni Nàtziu Garau

—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Più informazioni
commenta