Chenàbura, 9 de trìulas de su 2021
Impestos noos de Coronavirus in Ilartzi – Allarme e pistighìngiu in Ilartzi pro una filera de impestos noos. Pro immoe sunt duas is persones resurtadas positivas a su virus a pustis chi ant pigadu parte a una festa privada cuncordada in unu ristorante. Ma sunt unas cantas dosinas is persones postas in corantena de seguresa. Interessadu fintzas su Comune de Abbasanta, in ue bivet una de is duas persones positivas. Su sìndigu de Ilartzi Stefano Licheri at bogadu un’ordinàntzia in ue apostìvigat torra s’impreu a òbligu de sa mascheredda fintzas in logu abertu. Timoria fintzas pro sa festa de Santu Prameri; eris aiant bogadu sa boghe in contu de un’annuddamentu de su programma. Cosa, però, non cunfirmada dae su Comune.
Guàrdias turìsticas: mancant is mèigos – Non s’agatant mèigos disponìbiles e is guàrdias mèigas turìsticas de sa provìntzia de Aristanis arriscant de no abèrrere. Pro immoe paret chi siant lòmpidas a sa Assl duas domandas isceti, ma is mèigos chi serbint sunt dòighi. Su pròpiu problema ddu tenent fintzas is àteros territòrios de Sardigna. Is dotores chi diant àere pòdidu traballare in is guàrdias mèigas, difatis, sunt impignados in sa campànnia de vatzinatzione contras de su Coronavirus.
Donatziones de sàmbene – S’Avis cuncordat pro custa coa de chida puru sa regorta de sàmbene in is biddas de sa provìntzia de Aristanis. Oe in Santu Lussurzu si previdet sa presèntzia de s’autoemoteca, chi cras imbetzes at a èssere in Sèdilo. Domìnigu at a fàghere a donare su sàmbene in is seas Avis de Mòguru e de Arborea. S’Avis regordat chi podent donare su sàmbene totu is persones intra de 18 e 65 annos, mancari siant fàbicas o portadoras sanas de anemia mediterrànea, bastet chi pesent a su mancus 50 chilos e chi gosent de un’istadu de salude bellu. Non depent àere pigadu meighina dae pagu tempus nen depent àere terapias in cursu de faghimentu.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta