Sa Radiologia territoriale serrat e si firmant is screening – Su servìtziu de Radiologia territoriale serrat e si firmant is screening. Is locales in ue est acasagiadu, a intro de s’ispidale de Santu Martinu de Aristanis, bolent acontzados pro ite ca ddoe proet a intro. Su servìtziu at a abarrare serradu pro a su mancus duos meses. S’in casu abisòngiat, is mèigos ant a pòdere domandare is esàmenes de screening a sa Radiologia de s’ispidale Delogu de Ilartzi, a ue in custa simana de serrada de su servìtziu aristanesu ant a tramudare is sanitàrios chi in Aristanis non podent traballare.
Fèstival de sa literadura de biàgiu – Si firmat fintzas in Làconi su Fèstival internatzionale de sa literadura de biàgiu “D.H. Lawrence” chi ocannu si cuncordat in ocasione de is chentu annos de su biàgiu peri sa Sardigna de s’iscritore inglesu David Herbert Lawrence. Dae s’8 de trìulas a s’1 de austu est in programma sa de XIV editziones de sa rassìnnia cuncordada dae sa retza de is Comunes de Mandas (cabufilera), Làconi, Ìsili, Serri, Nuradha e Sòrgono, cun s’agiudu de sa Fundatzione de Sardigna, de s’Assessoradu regionale de s’Istrutzione pùblica, de s’Arst e de su Touring Club Sardigna.
Su Fèstival ddu cuncordat s’Assòtziu de is Entes locales pro is fainas culturales e de ispetàculu: si prevident apuntamentos meda pro iscobèrrere sa Trexenta, su Sarcidanu e su Mandrolisai, regordende su biàgiu chi aiat fatu peri s’ìsula David Herbert Lawrence.
Aristanis, imposta de istòngiu – Dae oe, giòbia 1 de trìulas, in Aristanis torrat in vigèntzia s’imposta de istòngiu. In is 15 meses passados, cando fiamus in emergèntzia sanitària, dd’aiant suspèndida: fiat istada una de is maneras pro agiudare is impresas.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta