Mèrcuris, 30 de làmpadas de su 2021
Retza de bias de sa provìntzia de Aristanis – Su prefetu de Aristanis Fabrizio Stelo domandat interventos lestros pro pònnere in seguresa sa retza de is bias de sa provìntzia de Aristanis, in cunditziones malas meda pro more de annos e annos de pagu contivìgiu. Si nd’est faeddadu in sa Cunferèntzia provintziale permanente. Sa Provìntzia de Aristanis at annuntziadu investimentos noos, mentras s’Anas at annoadu s’impignu pro pònnere cambas a is progetos giai aprovados pro is bias istatales. Su prefetu Stelo, in prus, at fatu un’apellu pro sa seguresa, sende chi est arribada s’istajone de is vacàntzias, e at invitadu a totus a si cumportare cun prudèntzia cando sunt ghiende unu mezu.
Marmidda, investimentos noos – Sa Regione e is Comunes ant firmadu sa cunventzione pro su programma Snai chi ponet oto milliones de èuros pro s’isvilupu de sa Marmidda. Si prevident interventos in s’iscola, pro s’amparu de sa salude, pro is trasportos e in s’avaloramentu de is produsimentos de su territòriu.
Mollu de Mare Mortu – Is giùighes de su Tar de sa Sardigna ant retzidu sa domanda pro suspèndere sa protzedura amministrativa de su Comune de Crabas e de s’Àrea marina amparada Sinis-Malu Entu pro su fràigu de su mollu nou in Mare Mortu. Su recursu dd’aiat presentadu s’assòtziu de diportistas Adina. Dd’at fatu a ischire su presidente de s’assòtziu, Ivo Zoccheddu.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta