Prima categoria

Su Gazetinu, martis 29 de làmpadas de su 2021

Su Gazetinu

Su Gazetinu OK

Martis, 29 de làmpadas de su 2021

Sèdilo, ocannu puru nudda Àrdia – S’Àrdia de Sèdilo, pro su de duos annos paris, non s’at a cùrrere. Dd’at firmada ancoras s’emergèntzia pro su Coronavirus. S’ant a fàghere isceti is addòbios religiosos in onore de Santu Antinu, ma fintzas custos ant a dèpere respetare totu is règulas de preventzione contras de sa pandemia. Eris ant publicadu su programma de totu is funtziones prevìdidas.

Fogu in Monteferru – Allarme eris in is sartos de Monteferru pro more de duos fogos, unu in Bonàrcadu, s’àteru in Sèneghe. Ddoe sunt dèpidos intervènnere un’aparèchiu e chimbe elicòteros, pro transire s’arriscu chi su fogu lomperet a is padentes de sa zona.

Vatzinos fuliados, ancoras chèscias – Àteras chèscias si sunt pesadas in contu de sa chistione de is 200 doses de vatzinu contras de su Coronavirus pèrdidas, pro more de problemas in s’organizatzione de su Tzentru pro is vatzinos de Ilartzi. Bruno Palmas, presidente regionale de su Tribunale de is deretos e de su dovere de su mèigu at domandadu fintzas s’interventu de su ministru Speranza e de su cummissàriu Figliuolo, pro pònnere in craru bene su chi est acontèssidu e chi at portadu a nche fuliare 200 siringas de vatzinu prontas. Sa federatzione de is mèigos de famìllia at cuntestadu, imbetzes, su rolu de su presidente de sa Cummissione regionale de sa Sanidade Domenico Gallus, chi si nd’est incuradu de s’initziativa de su tzentru ilartzesu. Sa federatzione s’est chesciada pro ite ca a is mèigos de famìllia, chi ant dadu sa disponibilidade issoro, non ddos ant interessados pro fàghere is vatzinos.

Antoni Nàtziu Garau

—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Più informazioni

commenta

Tutte le notizie

Su Gazetinu, lunis 22 de abrile de su 2024

Su Gazetinu, lunis 22 de abrile de su 2024

Is setziones Avis de sa regione s’addòbiant in Casteddu Sardu – Is voluntàrios de is setziones Avis de Sardigna si sunt addobiados eris in Casteddu Sardu pro sa de 53 assembleas annuales de s’Avis regionale, chi est istada fintzas s’ocasione pro faeddare de sa situatzione de is donatziones de sàmbene in s’Ìsula.

In su 2023 in Sardigna ant fatu 80.459 donatziones e, de custas, sa bellesa de 56.917 regortas dae is voluntàrios de s’Avis. Nùmeros incoragidores, si si pensat chi in su 2022 is sachitas fiant istadas 1381 in mancu.

Ma, mancari custos datos lassent isperare in bonu, s’Ìsula est ancoras in suferèntzia e ddi benit a mala bògia a importare sachitas de sàmbene pro parare fronte a sa domanda manna de sàmbene. Si contat, difatis, chi su bisòngiu regionale de ocannu passadu siat istadu de unas 110.000 sachitas, chi at fatu a ddoe parare fronte cun 80.000 donatziones de is sardos e 30.000 sachitas arribadas dae àteras regiones.

“Su de bastare dae sese pro su chi pertocat su bisòngiu regionale non depet èssere una chimera, ma sa raja de unu caminu istabilèssidu, in ue onniunu chi faghet parte de su sistema depet tènnere craru su rolu suo e, su pròpiu, depet tènnere craru sa tarea chi depet fàghere”, at naradu su presidente de s’Avis regionale Sardigna, Vincenzo Dore, invitende a totu is tzitadinos a èssere responsàbiles.

Comente a semper, su traballu de s’Avis in sa regorta de sàmbene est de importu, cun fainas meda e dies dedicadas a sa donatzione. “S’impignu nostru isceti in unu sistema cumplessu comente a cussu regionale non podet bastare”, at sutaliniadu Dore. “Bolemus torrare a espressare sa disponibilidade a traballare a manos de pare cun sa Giunta Todde, presentare is domandas e is progetos nostros pro parare fronte a manera funguda a totu is chistiones de su sistema regionale de sa regorta de su sàmbene”.

“Su de donare est una faina manna de bonucoro chi podet sarvare vidas meda”, at acabbadu su presidente Dore. “Su de fàghere parte de s’Avis bolet nàrrere a s’agatare in una cambarada de amigos impignada in s’isparghidura de is valores de su bonucoro, de sa tzitadinàntzia ativa e de sa cultura de su donu, prus che totu intra de is generatziones noas”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.