Su Gazetinu, sàbadu 26 de làmpadas de su 2021 - LinkOristano
Prima categoria

Su Gazetinu, sàbadu 26 de làmpadas de su 2021

Su Gazetinu OK

Sàbadu, 26 de làmpadas de su 2021

Mortu in un’intzidente – Unu giòvanu de 24 annos est mortu eris a merie in s’Istatale 388, acanta de Simaghis, pro more de is fertas graves chi s’est fatu in un’intzidente istradale: sa vetura sua, una Polo, nch’est iscuta a unu pilastru de su propassa-ferrovia chi ddu sunt fraighende dae annos. A su giòvanu ddi naraiant Guglielmo Angius, fiat de Fordongianus e in is annos passados aiat pèrdidu a unu frade, Tomaso, chi cun sa mototzicleta sua aiat atumbadu a pare cun un’àtera mototzicleta ghiada dae un’àteru giòvanu de Fordongianus: ambos duos is mototziclistas fiant mortos.

Campagna amiga e bonucoro – In Ilartzi at a abèrrere unu mercadu particulare de Campagna amiga. At a favorèssere su bonucoro: is produsimentos, difatis, ant a arribare pro su prus dae siendas impignadas fintzas in fainas de inclusione sotziale.

Crabas, ispetàculos – Su Comune de Crabas at bogadu su programma de is addòbios de s’istadiale. Est ricu meda de apuntamentos de cultura e ispetàculu fintzas a s’agabbu de s’istadiale.

Chimbe velas a Bosa – In Bosa Marina ant torradu a fàghere isbentuliare sa bandera cun chimbe velas, assignada dae Legambiente e Touring Club cunforma a is piessignos ambientales e a sa calidade de s’acasagiamentu in is costeras de sa Pianalza. Pro torrare a pònnere sa bandera ant cuncordadu fintzas una tzerimònia curtza.

Antoni Nàtziu Garau
—-
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Più informazioni
commenta