Su Gazetinu, mèrcuris 23 de làmpadas de su 2021

Su Gazetinu

Su Gazetinu OK

Su Gazetinu, mèrcuris 23 de làmpadas de su 2021

Su Gazetinu

Torrat a mòvere su servìtziu de oncoematologia – Eris ant apostivigadu su nulla osta pro su servìtziu de oncoematologia de s’ispidale de Santu Martinu de Aristanis, chi otenet aici s’acreditamentu e duncas at a pòdere acasagiare a malàidos noos. Custa detzisione in Aristanis dd’ant retzida cun presu mannu, ca sighit meses e meses de batallas fatas pro su deretu de is malàidos a si curare in Aristanis, sena de dèpere suportare – a prus de sa maladia – fintzas biàgios longos pro pòdere illebiare su male.

Fotògrafos protagonistas pro contare is Duas Jaras – Bator fotògrafos ant a contare in is meses imbenientes is biddas de Assou, Gonnonò, Sini e Useddus. Sa faina faghet parte de unu progetu presentadu eris dae su Cunsòrtziu de is Duas Jaras. Su Cunsòrtziu at a agiudare fintzas sa mustra “A banda”, chi s’at a fàghere in su comune de Bàini.

Faedda cunfirmadu presidente de Confcummèrtziu de Aristanis – A Nando Faedda dd’ant cunfirmadu in sa ghia de Confcummèrtziu de Aristanis. Dd’at elègidu pro acramada s’assemblea de is sòtzios. Faedda at a abarrare in càrriga pro àteros chimbe annos.

Làudes a is turres – Custu istadiale puru torrant is “Làudes a is turres”, is àndalas de caminu lentu in sa costera de su Sinis, cuncordadas dae s’Ufìtziu pro sa pastorale de su turismu, tempus lìberu e isport de s’Artzidiòtzesi de Aristanis, ghiadu dae don Ignazio Serra, cun s’agiudu de don Giacomo Zichi. Su primu apuntamentu est istabilèssidu pro lunis 5 de trìulas: mòvida e torrada in pratza de sa crèsia de Santu Larentzu. Sa cambarada at a arribare a sa turre de Cabu Mannu caminende unos ses chilòmetros.

Antoni Nàtziu Garau

—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Più informazioni

commenta

Tutte le notizie

Su Gazetinu, lunis 22 de abrile de su 2024

Su Gazetinu, lunis 22 de abrile de su 2024

Is setziones Avis de sa regione s’addòbiant in Casteddu Sardu – Is voluntàrios de is setziones Avis de Sardigna si sunt addobiados eris in Casteddu Sardu pro sa de 53 assembleas annuales de s’Avis regionale, chi est istada fintzas s’ocasione pro faeddare de sa situatzione de is donatziones de sàmbene in s’Ìsula.

In su 2023 in Sardigna ant fatu 80.459 donatziones e, de custas, sa bellesa de 56.917 regortas dae is voluntàrios de s’Avis. Nùmeros incoragidores, si si pensat chi in su 2022 is sachitas fiant istadas 1381 in mancu.

Ma, mancari custos datos lassent isperare in bonu, s’Ìsula est ancoras in suferèntzia e ddi benit a mala bògia a importare sachitas de sàmbene pro parare fronte a sa domanda manna de sàmbene. Si contat, difatis, chi su bisòngiu regionale de ocannu passadu siat istadu de unas 110.000 sachitas, chi at fatu a ddoe parare fronte cun 80.000 donatziones de is sardos e 30.000 sachitas arribadas dae àteras regiones.

“Su de bastare dae sese pro su chi pertocat su bisòngiu regionale non depet èssere una chimera, ma sa raja de unu caminu istabilèssidu, in ue onniunu chi faghet parte de su sistema depet tènnere craru su rolu suo e, su pròpiu, depet tènnere craru sa tarea chi depet fàghere”, at naradu su presidente de s’Avis regionale Sardigna, Vincenzo Dore, invitende a totu is tzitadinos a èssere responsàbiles.

Comente a semper, su traballu de s’Avis in sa regorta de sàmbene est de importu, cun fainas meda e dies dedicadas a sa donatzione. “S’impignu nostru isceti in unu sistema cumplessu comente a cussu regionale non podet bastare”, at sutaliniadu Dore. “Bolemus torrare a espressare sa disponibilidade a traballare a manos de pare cun sa Giunta Todde, presentare is domandas e is progetos nostros pro parare fronte a manera funguda a totu is chistiones de su sistema regionale de sa regorta de su sàmbene”.

“Su de donare est una faina manna de bonucoro chi podet sarvare vidas meda”, at acabbadu su presidente Dore. “Su de fàghere parte de s’Avis bolet nàrrere a s’agatare in una cambarada de amigos impignada in s’isparghidura de is valores de su bonucoro, de sa tzitadinàntzia ativa e de sa cultura de su donu, prus che totu intra de is generatziones noas”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.