Su Gazetinu, martis 22 de làmpadas de su 2021
Su Gazetinu
Tzentru Alzheimer – Tzerimònia de inauguratzione eris pro su Tzentru diurnu nou dedicadu a is malàidos de Alzheimer e maladias sìmiles, abertu a intro de s’Istitutu de Santa Maria Pipiedda, in S’Arremèdiu. Su Tzentru, chi aiat abertu giai dae una cantas chidas, podet acasagiare fintzas a binti malàidos. Immoe s’abetat de firmare sa cunventzione cun sa Regione pro pòdere gosare de su servìtziu gratis, gràtzias a su sistema sanitàriu.
Balneatzione, arribada s’ordinàntzia – Su cumandante de sa Capitaneria de portu de Aristanis, Matteo Gragnani, at bogadu s’ordinàntzia noa in contu de sa seguresa in sa balneatzione. S’ordinàntzia apostìvigat totu is règulas chi tocat a sighire custu istadiale.
Santu Giuanni, Grèmiu in festa – At a comintzare cras e at a agabbare chenàbura sa festa pro Santu Giuanni, contivigiada in Aristanis dae su Grèmiu de is massajos. Me in is tzelebratziones s’at a fàghere fintzas su càmbiu de sa bandera, chi marcat su càmbiu in sa ghia de su Grèmiu de su presidente betzu cun cussu nou.Si prevident unos cantos ritos religiosos in sa crèsia de Santu Giuanni de Froris. Ocannu puru in sa festa s’ant a dèpere respetare totu is normas de seguresa pro chircare de firmare sa pandemia de su Coronavirus.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta