Su Gazetinu, 15 de maju de su 2021
Su Gazetinu
Sa Sardigna dae lunis torra in zona groga – Dae lunis sa Sardigna at a èssere torra in zona groga. Unos cantos proibimentos e impèigos pro firmare s’isparghidura de sa pandemia de su Coronavirus ant isparèssere de su totu o ant a èssere prus lèbios. At a fàghere a si transire dae unu comune a un’àteru e at a fàghere a papare e/o a bufare in tzilleris, pitzerias, agriturismos e ristorantes, bastet chi siat in logu abertu.
Vatzinatziones pro totu is chi tenent chimbanta annos – In Sardigna puru movet sa vatzinatzione contras de su Coronavirus pro totu is chi tenent chimbanta annos. Sa Regione, a pustis de carchi duda, at istabilèssidu de abèrrere a totu is chi faghent parte de custa fasca de edade. Dae eris est aberta sa prataforma de Poste Italiane pro si prenotare.
Duas Jaras, un’istadiale prenu de addòbios culturales – Un’istadiale prena de mùsica, teatru e mustras in is programmas de su Cunsòrtziu de is Duas Jaras, chi at istèrridu unu calendàriu ricu meda chi at a interessare 12 comunes e chi at a sighire s’àndala de su regordu-aprètziu de Dante Alighieri.
Donatziones de sàmbene – Donatziones de sàmbene oe in provìntzia de Aristanis gràtzias a s’Avis e a s’agiudu de s’Assl de Aristanis. Oe s’autoemoteca est in Bauladu. Cras, imbetzes, at a èssere in Aressa. E semper cras, domìnigu, at a abèrrere sa setzione Avis de Mòguru, in ue at a fàghere a dare su sàmbene. Dae s’Avis de Aristanis lompet s’invitu a donare su sàmbene sena de timoria peruna, fintzas in su tzentru trasfusionale de s’ispidale de Santu Martinu.
Sàbadu, 15 de maju de su 2021
Antoni Nàtziu Garau
—-
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta