Su Gazetinu, 18 de martzu de su 2021
Su Gazetinu
Coronavirus, ordinàntzia – Is chi non sunt residentes in Sardigna podent torrare a is de duas domos chi tenent me in s’ìsula nostra isceti pro chistiones de traballu, pro apretu mannu o pro chistiones de salude. Dd’apostìvigat un’ordinàntzia firmada eris note dae su presidente de sa Regione Solinas pro sa gestione de s’emergèntzia de sa Covid-19.
Ilartzi, ispidale – In s’ispidale “Delogu” de Ilartzi sunt proende a torrare a abèrrere su repartu de Meighina e cussu de Chirurgia. Is ghiadores de sa sanidade sunt chirchende de agatare su personale chi serbit.
Bosa, bìsitas a is museos a indonu – Museos gratis in Bosa pro totu cussos chi ant a bisitare sa tzitadedda oru oru de su Temo fintzas a su 30 de abrile. S’initziativa dd’at istabilèssida s’Assessoradu de su Turismu e de sa Cultura de su Comune.
Trenigheddu birde – Domìnigu chi benit 21 de martzu torrat a mòvere su trenigheddu birde. Ant a èssere in funtzione siat sa litorina istòrica chi dae Macumere portat a Bosa, siat cussa chi dae Mandas lompet fintzas a Làconi.
Istatale 131 – A intro de custu mese diant dèpere agabbare is traballos de faghimentu a nou de su pìgiu de asfaltu in su tretu de s’Istatale 131 intra de Marrùbiu e Uras. Pro immoe si sighit a biagiare in una carregiada isceti a duas corsias.
Abbadura – Pro is chi depent presentare sa domanda de utèntzia pro abbare a su Cunsòrtziu de bonìfica de su Campidanu de Aristanis ddoe at prus tempus. S’iscadèntzia noa dd’ant istabilèssida pro su 30 de abrile. Dd’at detzisu su Consìgiu de amministratzione ghiadu dae Carlo Corrias.
Biddobrana – Su Comune de Biddobrana at a fàghere mòvere una campànnia de sensibilizatzione contras de su giogu de azardu: in sa bidda intra de Monti Arci e Grìghini, ònnia annu, s’ispendent 750 mìgia èuros pro chircare sa sorte bona.
Giòbia, 18 de martzu de su 2021
commenta