Su Gazetinu, 16 de martzu de su 2021

Su Gazetinu, 16 de martzu de su 2021

Su Gazetinu

Vatzinos – S’Assl de Aristanis at detzìdidu de suspèndere pro duas dias is vatzinatziones de su personale chi faghet parte de is fortzas de s’òrdine e de s’iscola, a pustis de sa detzisione de s’Aifa chi at apostivigadu pro cautela su proibimentu de impreare su vatzinu AstraZeneca contras de sa Covid-19 in totu su territòriu natzionale, abetende su chi at a nàrrere s’EMA in contu de sa chistione. Sa suspensione balet oe e cras.

Is tzitadinos giai cunvocados in is Logos de vatzinatzione, duncas, non s’ant a dèpere presentare: s’apuntamentu sàrtiat! Su Servìtziu de Igiene e Sanidade pùblica at a frunire a pustis àteros informos a is interessados, aici etotu at a fàghere cun totu cussos chi – faghende parte de is pròpias categorias de is fortzas de s’òrdine e de is iscolas – teniant sa vatzinatzione giai prenotada in is dies imbenientes.

At a sighire, imbetzes, a manera regulare in provìntzia de Aristanis sa campagna de vatzinatzione contras de sa Covid-19 pro is chi tenent 80 annos e fintzas cussa me in is istruturas residentziales pro antzianos, in ue fiat giai in programma de fàghere su vatzinu Pfizer-Biontech.

Is àteros antzianos chi tenent a su mancus 80 annos residentes in oto comunes de sa provìntzia ant a pòdere andare a manera regulare a is Logos de vatzinatzione cuncordados a manos de pare cun is Amministratziones comunales issoro.

Oe s’apuntamentu est in Arriora, cras in Nurachi. Giòbia ant a vatzinare is antzianos de Boàtiri, Santu Lussurzu e Paulle. In Terraba si prevident duas dies, giòbia e chenàbura. In Narabuìa s’apuntamentu est pro su 19 de martzu, mentres su 20 est in Masuddas.

Martis, 16 de martzu de su 2021