Su Gazetinu, 22 de freàrgiu de su 2021
Su Gazetinu
Santa Justa, Avis – Chie at a donare su sàmbene at retzire in donu unu salume. Sa faina originale dd’at pensada sa setzione de s’Avis de Santa Justa, gràtzias a sa disponibilidade de su salumifìtziu Monte Arci. S’at a pòdere donare sàbadu 6 de martzu, dae is 8.30 a mesudie, in s’Open Space, su locale comunale in ue in tempus passadu ddoe fiat sa mensa de su Tzentru de formatzione Anap. O, si nono, si podet donare fintzas in su Tzentru trasfusionale de s’ispidale de Santu Martinu de Aristanis e, a pustis, faghet a nde retirare dae s’Avis de Santa Justa su donu postu a disponimentu dae su salumifìtziu Monte Arci.
Bosa – A pustis de agiomai chimbe meses Bosa est torra lìbera dae sa Covid-19. Non ddoe at impestu perunu de coronavirus: no acontessiat dae su mese de cabudanni. Dd’at fatu a ischire su sìndigu Pier Franco Casula, chi at invitadu a totus – comente si siat – a respetare is normas e is cumportamentos de seguresa sanitària.
Casteddu – Leonardo Semplici at a èssere s’allenadore nou de su Casteddu. Remplasat a Eusebio Di Francesco. Su càmbiu in panchina at a acontèssere in is oras imbenientes, a pustis de un’àtera derruta de s’iscuadra ruja-biaita. Ddoe at a àere fintzas unu remplasamentu in sa dirigèntzia isportiva de sa sotziedade.
Lunis, 22 de freàrgiu de su 2021