Su Gazetinu, 21 de freàrgiu de su 2021
Su Gazetinu
Aristanis, atropèlliu de gente – Atropèlliu de gente e gherra eris a sero in pratza de Roma, in Aristanis. Ddoe sunt dèpidas cùrrere is patùllias de is Carabineris e de sa Politzia. Giòvanos meda non amegaiant de respetare is règulas pro firmare s’isparghidura de su coronavirus.
Ispidale de Santu Martinu, Prontu sucursu – Ancoras istorbos in su Prontu sucursu de s’ispidale de Santu Martinu de Aristanis. Tempos de abetu tropu longos pro more de is ritardos in su faghimentu de is tampones. In s’interis, in Ilartzi, eris ant fatu un’àtera manifestatzione domandende de torrare a abèrrere su logu de Primu sucursu de s’ispidale Delogu.
Vatzinos – A totu is sardos chi tenent prus de 16 annos ddos ant a vatzinare a intro de su mese de austu. Ddu previdet su Pranu cuncordadu dae sa Regione. E dae su primu de martzu at mòvere sa vatzinatzione de totu is chi tenent prus de 80 annos.
Crabas, Gigantes – Is dischentes de is iscolas de Crabas ant mandadu agiomai 200 lìteras a sa subrintendente de Casteddu Maura Picciau. Cun s’islogan “Maura, torra-ddoe a pensare …” ant domandadu de firmare su tramudu a Casteddu de is istàtuas de is Gigantes acasagiadas in su museu Giovanni Marongiu.
Domìnigu, 21 de freàrgiu de su 2021
commenta