Su Gazetinu, 13 de freàrgiu de su 2021
Su Gazetinu
Coronavirus – In Sardigna si sunt propassados is 40.000 impestos de coronavirus dae su cumentzu de sa pandemia. Eris s’Unidade de crisi regionale nd’at contadu àteros 4 in provìntzia de Aristanis.
Temporada, allerta mèteu – S’Amparu tzivile at bogadu un’allerta mèteu pro arriscu idràulicu cun còdighe grogu, chi balet fintzas a mesunote de oe. Sunt interessadas is zonas de Montibèciu-Pischinàpiu e de su Tirsu. Pro su Logudoro, a prus de s’arriscu idràulicu, ddoe est fintzas s’arriscu idrogeològicu.
Su Tzentru funtzionale detzentradu de s’Amparu tzivile at bogadu fintzas un’avisu de cunditziones mèteu malas pro more de temperaduras bassas, chi balet dae is 18.00 de oe e fintzas a is 7.59 de cras, domìnigu. Cumentzende dae su merie de oe e pro totu su mangianu de cras, in Sardigna s’at a connòschere un’ismèngua de is temperaduras, chi s’ant a abbassare de 2 grados a suta de zeru. S’abba chi at a ghetare intra de custu merie e cras diat pòdere ingendrare sa formatzione de chilighia e àstragu in terra.
Gigantes, manifestatzione – Oe in Crabas ddoe at a èssere s’addòbiu de chèscia pro defensare is Gigantes de Mont’’e Prama cuncordadu dae s’Amministratzione comunale. Ddoe ant a pigare parte in medas.
Droga, denùntzias e issucuta – A s’agabbu de una faina de Giustìtzia in Bosa, Sune e Bòrore si sunt contadas 6 denùntzias pro possessu de istupefatzentes e 560 chilos de cannabis issucutados. Sa faina dd’ant contivigiada is Carabineris de is istatziones locales paris cun cussos de sa Cumpangia de Macumere.
Sàbadu, 13 de freàrgiu de su 2021
commenta