Su Gazetinu, 8 de ghennàrgiu de su 2021 - LinkOristano
Prima categoria

Su Gazetinu, 8 de ghennàrgiu de su 2021

Su Gazetinu

Su Gazetinu OK

Su Gazetinu, 8 de ghennàrgiu de su 2021

Su Gazetinu

Coronavirus, àteros tres mortos – Tres mortos e 45 impestos noos de coronavirus in provìntzia de Aristanis, in s’ùrtimu agiornamentu de eris de s’Unidade de crisi regionale. Su Comune de Aristanis at fatu a ischire de àteros 8 impestos.

Giòvanu morit in un’intzidente – Cummovimentu mannu pro sa morte de Manuel Zoccheddu, giòvanu de binti annos de Tiria mortu eris in un’intzidente istradale. Cun sa Renault Clio chi ghiaiat nch’est essidu foras de bia e sa vetura nch’est ruta in unu canale a pagu tretu dae Prammas.

Àteros impestos de Covid-19 in s’ispidale – Àteros duos impestos de coronavirus in s’ispidale de Aristanis, in Radiologia e in su Prontu Sucursu. In su Prontu Sucursu etotu sa situatzione est ingendrende istorbu mannu. Su personale est in dificultade e ddoe at malàidos meda abetende de agatare una sistematzione pro su ricòveru. Eris fiant in 14.

In Tharros su mundiale de ciclocross? – Sa zona de Tharros diat pòdere acasagiare una tapa de su mundiale de ciclocross. Sa proposta dd’ant presentada a sa Regione is organizadores de su Giru de Sardigna e immoe amegant de nde resonare cun s’Assessoradu de su Turismu.

Iscuderias de is sartigliantes – Una norma posta in su Pranu nou pro sa domo diat pòdere sarvare is iscuderias de is sartigliantes de Aristanis, cunsideradas abusos edilìtzios. Sa norma dd’at aprovada eris a sero su Consìgiu regionale cunforma a sa proposta de su consigieri aristanesu Francesco Mura e cun s’agiudu de totu is àteros consigieris regionale aristanesos.

Chenàbura, 8 de ghennàrgiu de su 2021

commenta