Addòbios
Antonio Gramsci in is òperas artìsticas de Francesco del Casino
In su Tzentru pro is servìtzios culturales U.N.L.A. de Aristanis oe s’at a presentare su libru “Gramsciart”, s’interpretatzione artìstica de Francesco del Casino in contu de Antonio Gramsci. Custu merie, a is 18.00, in sa sala de is cunferèntzias de su Tzentru, s’autore at a faeddare de su traballu suo paris cun Pietro Clemente.
Mèrcuris, su 19 de làmpadas de su 2019
Su Gazetinu, chenàbura 24 de maju de su 2024
Cantu costant is mensas de is iscolas in Sardigna? – S’assòtziu Cittadinanzattiva incoronat s’ìsula nostra comente a sa regione cun is mensas de iscola prus a baratu. 61 e 65 èuros est su chi una famìllia sarda at ispesu in mèdia in s’annu de iscola chi est acanta de acabbare pro sa mensa de unu fìgiu iscritu in s’iscola de sa pipiesa e in cussa primària, a cunfrontu cun is 85 èuros de sa mèdia natzionale. A livellu natzionale, sa crèschida cunforma a su 2022/2023 est istada in mèdia de prus de su 3%, cun diferèntzias dae unu logu a s’àteru: in Sardigna sa crèschida est de su 3,50%.
Est su chi nde essit a pìgiu dae su de VII Iscrucullos in contu de is mensas de iscola, in ue Cittadinanzattiva at pigadu in cunsideru is tarifas de totu e is 110 cabu-logos de provìntzia siat pro s’iscola de sa pipiesa, siat pro s’iscola primària. In sa pàgina web ufitziale si-ddoe agatant totu is datos de s’iscrucullu.
Sa famìllia de riferimentu pro fàghere custa indàgine est formada dae tres persones (babbu, mama e unu fìgiu), cun unu rèdditu brutu de € 44.200 a s’annu, chi torrat cun unu ISEE de € 19.900. In su contu de sa cuota annuale de su servìtziu de ristoratzione in iscola s’est contada una frecuèntzia de 20 dies a su mese, pro 9 meses in totu, francu àteras cuotas eventuales annuales e/o mensiles.
Dae sa relata nd’at essidu chi su cabu-logu sardu prus baratu pro sa ristoratzione in iscola est Casteddu, in su primu postu in sa classìfica de s’ispesa siat pro s’iscola de sa pipiesa siat pro s’iscola primària, cun 2,15 € a pastu e cun unu costu a s’annu a càrrigu de is famìllias de 387 èuros (pro s’iscola de sa pipiesa) e de 533 èuros (pro sa primària). Sighit in fatu Aristanis, cun 2,45 èuros a pastu (in s’iscola de sa pipiesa s’ispendet 2,45 èuros a pastu, mentras is dischentes de sa primària ispendent 2,96 èuros a pastu), 59 èuros a su mese e 441 èuros a s’annu in is iscolas de sa pipiesa e 533 èuros a s’annu in s’iscola primària.
A pustis ddoe sunt Tàtari, cun un’ispesa de 585 èuros a s’annu siat in s’iscola de sa pipiesa siat in s’iscola primària, Nùgoro cun un’ispesa de 612 èuros a s’annu (in s’iscola de sa pipiesa) e de 693 èuros a s’annu (in sa primària), e in fines Carbònia, cun costos chi lompent a 709 èuros in ambas duas is iscolas.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
