“Zuradili” su cineforum prò ammentare sa vidda antica de Marruviu - LinkOristano

“Zuradili” su cineforum prò ammentare sa vidda antica de Marruviu

Michele Contu unu de sos organizzadores intervistau da Frantziscu Pirisi in sa trasmissione de Radio Cuore, Imparis. Oe a sas 19.20 – 21. 20 – 22.20 – 23.20

Zuradili

Sapadu cominzada in Marruviu s’attividade de su cineforum (pojezione de un film e arresonada in supra de s’istoria appenas vida), promoviu dae su sotziu Consulta giovanile. S’attopu est a sas 18, in sa sede de su sotziu matessi. Su primu argumentu est in supra de su territoriu (s’ambiente, comente si nada in italianu) de sa Sardigna, chi ada a essere trattau in su documentariu “Adiosu”, attu dae su comitau Sardegna Abbandonata. De cust’attopu e de sas atteras attividades de sa Consulta amus a faeddare oje in sa rubrica in limba sarda de Radio Cuore, “Imparis”. In s’istudiu Michele Contu, 20 annos, unu de sos organizzadores de s’attividade.

Su cineforum est mutiu “Zuradili”, prò ammentare sa vidda antica de Marruviu, chi idi costruia in su monte. Sos zovanos ana preventivau diversos attopos inuve s’ada a faeddare de sas tantas chistiones chi li lo interessana prus dae accurzu e medas de sos temas chi sunu de importu mannu pro su presente e su tempus venidore de sa Sardigna.

In su film preventivau prò Sapadu ana a essere mustraos sos retratos e sos contos de tanta partes de sa Sardigna chi si che sunu impoverinde e dae uve sa zente si ch’est andande: viddas e istradas bodias, vrabbicas abbandonas. Unu mortoriu, come si nada in sardu, chi non est arribau de sesi, ma in su cale vada gurpa de s’omine e mescamente de chie ada cuvrennau. Sa cufferentzia chi ada a sighire su documentariu ada a chircare de achere cumprendere de prus su chi est istau su manizu, e sos dannos a su territoriu e a sas comunidades. Custu cun s’azzudu de su giornalista Nicola Pinna (de su giornale “La Stampa”, de Torino), su presidente de su zotziu ambientalista Gruppo d’intervento giuridico, Stefano Deliperi, e s’avvogau e politicu indipendentista, Gianfranco Sollai.

Sa rubrica, cuvrennà in s’istudiu dae Francesco Pirisi, venidi trasmitia a sas 19.20-21,20 – 22,20 e 23, 20.

Ammentamus chi Radio Cuore de Aristanis, est presente in sa Vrequenza 97. Si podede ascurtare puru in su situ de Internet, intrande in s’indiritzu www.radiocuore.net.

Jovia, 24 aprile 2014

commenta